நியூசிலாந்துக்கு எதிரான ஆட்டத்தில் கென்யா 69 ரன்களில் சுருண்டது. 8 ஓவர்களின் விக்கெட் இழப்பின்றி வெற்றி இலக்கை எட்டிய நியூசிலாந்து மிக எளிதாக வெற்றி பெற்றது.
உலகக் கோப்பை போட்டியின் இரண்டாவது லீக் ஆட்டம் சென்னையில் ஞாயிற்றுக்கிழமை நடைபெற்றது. இதில் ஏ பிரிவில் உள்ள நியூசிலாந்து - கென்யா அணிகள் மோதின.
முதலில் ஆடிய கென்யா 23.5 ஓவர்களில் 69 ரன்களுக்கு ஆட்டமிழந்தது. பின்னர் ஆடிய நியூஸிலாந்து 8 ஓவர்களில் விக்கெட் இழப்பின்றி 72 ரன்கள் சேர்த்து வெற்றி கண்டது. முன்னதாக டாஸ் வென்ற கென்யா முதலில் பேட் செய்தது. ஒபான்டா, வாட்டர்ஸ் ஆகியோர் முதலில் களம் இறங்கினர். இருவரும் நிதானமாக ஆடி ரன் சேர்த்தனர். 6 ஓவரின் கடைசி பந்தில் ஒபான்டா ஆட்டமிழந்தார். அவர் 6 ரன்களுடன் வெளியேறினார்.
அடுத்து வந்து ஒபுயாவும் நிதானமாக ஆடினார். 12-வது ஓவரில் 16 ரன்களில் வாட்டர்ஸ் அவுட் ஆனார். அடுத்து வந்த வீரர்கள் வருவதும் போவதுமாக இருந்தனர். ரகிப் படேல் ( 16 ரன்கள், அவுட் இல்லை) தவிர பின் வந்தவர்கள் யாரும் ஒன்றை இலக்க ரன்னை தாண்டவில்லை. 3 வீரர்கள் ரன் ஏதுமின்றி வெளியேறினர். கேப்டன் கமான்டே 2 ரன்கள் மட்டுமே எடுத்தார். இதனால் 23.5 ஓவர்களில் கென்யா 69 ரன்களுக்குள் சுருண்டது. நியூசிலாந்தின் பென்னட் (4 விக்கெட்), ஜோக்கப் ஓரம், செüதி (தலா 3 விக்கெட்) ஆகியோர் சிறப்பாகப் பந்து வீசினர்.
70 ரன்கள் என்ற எளிய இலக்குடன் நியூசிலாந்தின் குப்தில், நாதன் மெக்குல்லம் ஆகியோர் களம் இறங்கினர். தொடக்கம் முதலே அடித்து ஆடி ரன் சேர்த்தனர். இதனால் 8 ஓவர்கள் முடிவில் 72 ரன்களைச் சேர்ந்து 10 விக்கெட்டுகள் வித்தியாசத்தில் நியூசிலாந்து எளிதாக வென்றது. இந்த ஆட்டத்தில் மொத்தமே 31.5 ஓவர்கள்தான் வீசப்பட்டன. ஆட்டம் சுமார் இரண்டரை நேரம் மட்டுமே நடைபெற்று முடிவடைந்தது.
குப்தில் 39 ரன்களும், மெக்குல்லம் 26 ரன்களும் எடுத்து கடைசி வரை ஆட்டமிழக்காமல் இருந்தனர். ஆட்ட நாயகனாக பென்னட் தேர்ந்தெடுக்கப்பட்டார். இந்த வெற்றி தங்கள் அணிக்கு மிகுந்த நம்பிக்கையை அளித்துள்ளதாக நியூசிலாந்து கேப்டன் டேனியல் வெட்டோரி தெரிவித்துள்ளார்.
25-ம் தேதி நடைபெறும் லீக் ஆட்டத்தில் நியூசிலாந்து நடப்புச் சாம்பியன் ஆஸ்திரேலியாவை எதிர்கொள்கிறது.
கென்யா தனது அடுத்த ஆட்டத்தில் பாகிஸ்தானை எதிர்கொள்கிறது. இந்த ஆட்டம் 23-ம் தேதி நடைபெறவுள்ளது.
0 comments to "கென்யாவை வீழ்த்தியது நியூசிலாந்து"